Enn eitt fínt heiðursmerki til Tór Mortensen

Fyri tveimum vikum síðani vann hann NM-bronsu fyri U20, seinasta vikuskiftið vann hann 5 gullmerki til FM og í dag bleiv tað so til silvur, tá DM fyri vaksin var hildið á NRGi Park í Århus. Tórur vann jú DM innandura í vetur, og var tí sjálvsagdur millum favorittarnar. Spennandi var tó, hvat afturvendi Peder Nielsen var førur fyri. Hann er við sínum persónliga meti, 16,73 metrar, næstbesti trístøkkari yvirhøvur í Danmark.

Tað bleiv ein jøvn kapping millum Tór og Peder. Og so spennandi, sum tað kundi blíva. Tórur førdi eftir fyrsta umfar og í øðrum umfari økti hann og sá fyri fyrstu ferð 15-talið. 15,00 m, (+2,1) Peder svaraði aftur í triðja umfari við 15,10 m. Tórur megnaði ikki heilt at matcha Peder í triðja umfari, men aftursvarið var kortini bæði persónligt og føroyskt met. 15,03 m (+0,8). Í fjórða umfari kom Tórur enn einaferð við einum dyggum aftursvari og javnaði úrslitið hjá Peder. 15,10 (+2,9) Men nú førdi Tórur aftur, tí hansara næstbesta lop var betri. Peder leyp seinasta lopið í fjórða umfarinum, og enn einaferð skifti kappingin oddamann. 15,36 m fekk Peder mátað.

Tórur er ikki bara framúr dugnaligur í trístøkki. Seinasta vikuskiftið fangaði Bjørg hesa myndina, tá Tórur setti føroyskt met í 110 m rimarenning við 17,15 sek. 

Tórur hevði enn tvey lop eftir, men megnaði ikki at svara aftur. Úrslitið er tó framúr gott, og Tórur sá 15-talið heilar tríggjar ferðir í dag. Og hann hevur altso ikki sæð tað fyrr.  Við lopinum í dag kemur Tórur heilt upp sum nummar 16 á listanum yvir bestu trístøkkarar í Danmark nakrantíð. Her er hann í harðari kapping við m.a. gamlar ítróttarstjørnur heilt afturi frá 60’unum og 70’unum. Seinastu trý árini er tað bara gullvinnarin í dag, Peder Nielsen, sum hevur lopið longur enn Tórur.

Okkara besti 100 m rennari hesi bæði seinastu árini, Rúni Jacobsen, var eisini við til DM. Hann gjørdist nummar fýra í sínum riðli við 11,52 sekundum. Hann fekk eitt fitt lot beint í móti, (2,1) so enn má hann bíða eitt sindur við føroyska metinum, sum vit øll vita hann kann taka.

Úrslitið sæst niðanfyri.