Home FÍF Oyggjaleikakrøvini til Jersey 2015 klár

Oyggjaleikakrøvini til Jersey 2015 klár

by Hallur Holm

Tað tykist so stutt síðani oyggjaleikirnir á Bermuda vórðu hildnir. Men tíðin gongur við risafetum, og menn og kvinnur eru av álvara farin at fyrireika seg til oyggjaleikirnar á Jersey í 2015. Kappingarárið innandura stendur fyri framman, og fleiri eru tey, ið ætla at knógva onkrum oyl-kravið beinanvegin. Næsta vikuskifti verður Stórmót IR í Reykjavík. Tá fara umboð fyri bæði Hvirluna, Bragdið og Treysti at luttaka. Síðani verður tað DM og DM-U innandura, har fleiri royndir ivaleyst verða at klára okkurt kravið.

Aloftast eru krøvini hjá flestum luttakarum klárað árið frammanunda leikunum. Og einki løgið í tí. Seinasta freist at klára okkurt av krøvunum er 1. mei 2015, og tá er kappingarárið uttandura nóg illa komið í gongd. So tað er serliga summarið 2014, sum fer at geva størstu ábendingina um, hvussu stórur hópurin verður í 2015.

Nøkur av krøvunum eru broytt í mun til fyri tveimum árum síðani. Bæði hendan vegin og hin vegin. Úttøkubólkurin er gingin burtur frá at halda seg neyvt til 750 IAAF-stig, og ístaðin hyggja eftir hvussu støðið er á oyggjaleikunum, og eisini hvussu toppstøðið er í Føroyum. Harafturat hevur bólkurin ynskt at brúka meira rund tøl.

Hetta eru so bert tey hørðu krøvini til sjálvt úrslitið. Hendan talvan verður løgd undir krøv á bjálkanum á forsíðuni, og har kemur eisini at standa, hvørji onnur atlit verða tikin, fyri at verða úttikin.

Krøvini til Elitubólkin og til Talentbólkin eru eisini á trappuni, og verða kunngjørd innan vikuskiftið.

 

Menn Grein Kvinnur
11.40 100m 13.50
23.30 200m 27.30
52.00 400m 61.00
2.00.00 800m 2.20.00
4.08.00 1500m 4.55.00
10.10.00 3000 M forðarenning 12.30.00
16.00.00 5000m 18.45.00
33.20.00 10000m 39.00.00
1.15.00 Hálvt maraton 1.27.00
16.50 110/100 m rimarenning 17.50
60.00 400 m rimarenning 70.00
6.30 Longdarlop 4.80
13.30 Trístøkk 10.00
1.85 Hæddarlop 1.55
4.00 Stangarlop 3.20
13.00 Kúluvarp 10.50
55.00 Spjótkast 35.00
42.00 Klingrukast 35.00
45.00 Sleggjuvarp 39.00

 


Oyggjaleikalandsliðið í 2013. Hesi verða væntandi øll við aftur í 2015. Harumframt standa fleiri og banka uppá, so hópurin verður ivaleyst stórur næstu ferð – helst tann størsti nakrantíð.

1 comment
0

Related Articles

1 comment

Fríðrikur 21.01.14 - 09:56

Ja, hetta verður spennandi, og eri samdur við greinaskrivaranum í at fleiri standa og banka uppá:)

Til dømis rann Katarina Høj væl undir OYL kravi í Svøríki í fjør á 800m, og allarhelst eru onnur við eisini.

Koyri á øll somul.

Comments are closed.