Skráin fyri summarhálvuna løgd

Tann gløggi lesarin hevur kanska varnast, at skráin fyri summarhálvuna er kunngjørd fyri nøkrum døgum síðani. Mars er meira enn hálvrunnin, og seinastu tiltøkini vetrarhálvuna eru TF-renningin í Klaksvík 19. mars og 5. og seinasta umfar av Vetrarkappingini í Runavík 26. mars.

Í apríl mánað verður lagt bragdliga fyri við venjaraskeiði bæði 1.-3. apríl og 29. apríl-1. mei. Í apríl verður eisini VILT í Suðuroy og stóra Flaggdagsrenningin hjá Bragdinum. Seint í mei verður fyrsta av í alt 5 umførum í Grand Prix fyri børn og ung. Hendan kappingin fer at koyra eftir sama leisti sum í fjør. Tað er enn ikki endaliga avgjørt, hvat felag skal vera vertur hvønn dagin. Tað fáa vit endaliga staðfest, tá fótbóltsdystirnir á Svangaskarði eru fastlagdir. Tað kann eisini væl vera, at feløgini vilja flyta kappingardagin eitt vet í mun til tað sum nú er lýst. So enn er eitt sindur av elastisiteti í hesari kappingini.

Vónandi verðru Grand Prix fyri børn og ung eins væleyndað í ár sum í fjør. Her er tað frá triðja umfari á Tórsbreyt.

Greitt er tó nær tær tríggjar FM-kappingarnar í landavegsrenning skulu fyriskipast. Tann fyrsta verður 1/2 maraton í Havn fyrsta vikuskifti í mei, síðani er tað FM á 10 km, sum verður á Eystanstevnu og FM í heilum maraton verður í Havn í sambandi við Tórshavn Maraton fyrst í september. Aftur í ár fara vit at hava FM á breyt eitt heilt vikuskifti – bæði hjá børnum og vaksnum. FM á breyt fyri vaksin verður leygar- og sunnudagin 6. og 7. august (sama vikuskifti sum Summarfestivalurin) og FM á breyt fyri børn og ung verður vikuskiftið 20.-21. august. Báðar kappingarnar verða á Tórsbreyt.

Grand Prix fyri vaksin verður aftur í ár fyriskipað á bygdastevnunum kring landið, og endar á Ólavsøku. Fyrsta umfar verður á Norðoyastevnu 4. juni. Tað er enn ikki heilt avgjørt, hvussu nógvar GP renningar verða, og heldur ikki er reglugerðin fyri kappingina dagførd enn. Men tað kemur alt í rættlag nakað áðrenn Norðoyastevnuna.

Aftur í ár byrjar Grand Prix fyri Vaksin á Norðoyastevnu. Hetta er frá startinum í 2010, har talan gjørdist um metluttøku fyri vaksin

Hvirlan hevur trý tiltøk á kalendaranum. Fyrst er tað Virkisleikir í mei, síðani stóra barnatiltakið Stuttleikir í juni og síðani altjóða kappingina Jatnatøk í juli. Treysti hevur eisini trý tiltøk á skránni:  Fossanesrenningin í juli, Viðareiðisrenningin í august og at enda stóri hugnaligi felagstúrurin Kalsoyarrenningin. Aftur í ár fer MÍF at skipa fyri harða túrinum Top Run. Tað verður seint í august.

Síðst men ikki minst er 2011 oyggjaleikaár. Føroyska ferðalagið fer úr Føroyum til Isle of Wight 25. juni og verður aftur 1. juli.

Oyggjaleikir verða í summar. Heri Ziska hevur vunnið mangt eitt heiðursmerki á oygjaleikum.

Tað kann væl hugsast, at feløgini hava onnur tiltøk í stoypiskeiðini, ella at onkur kapping ella tiltak er gloymt í rúgvuni. Sigið endiliga frá, um tað eru onnur tiltøk, ið skulu við í skránna.