Fyrsta umfar av Betri Stórkappingini var leygardagin. Veðurlíkindini vóru hampilig, ella í øllum førum betri enn veðurtíðindini, og tá vit hugsa um, hvussu veðrið bleiv seinni á degnum, skulu vit prísa okkum lukkulig fyri at alt var leyst og liðugt longu kl. 14.30. Hann var sunnan í ættini leygardagin, og sunnan er stórt sæð einasta góða ætt á Tórsbreyt. So hóast fitt av vindi, lívdi væl undir høga vegginum, og stórt sæð allar spurttíðirnar kundu góðkennast fyri vind.

Nógv góð úrslit vóru á degnum, og ilt er at taka eitt fram um annað. Men tað stakk í eyguni at síggja, hvussu nógv Guðrið K. Petersen hevur tikið seg fram, og at hon leygardagin kastaði næstlongsta kast av føroyskari kvinnu nakrantíð við sleggjuni. Randi Kúrberg eigur føroyska metið frá 2009 við 40,46 m. Guðrið kom heilt út 39,10 og greiddi tí eisini væl og virðiliga oyggjaleikakravið, sum er 37,00 m.

Guðrið er í rúkandi menning, og leggur metur oman á metur á síni bestu úrslit. 

Alda S. Lamhauge rann ein flottan 100 m og fekk við 13,15 sek næstbestu tíð nakrantíð í Føroyum. Einans føroyska mettíðin hjá Elisabet Holm Simonsen, 13,08 er betri. Sostatt hevur eisini Alda longu megnað at renna undir oyggjaleikakravtíðina.

Alda, sum nú rennur í bláum fyri Bragdið, rann longu í ársins fyrstu kapping sína bestu tíð nakrantíð, og var undir oyl-kravinum. Sjøfn fekk eisini eina sera góða tíð.

Úrslit 1. BETRI Stórkapping 2018

Smílandi og flúgvandi. Stuttligt at íðka frælsan ítrótt, heldur Axel

Gentur 16-17 spenna avstað á 100 metrum. Á degnum vóru heilar seks gentur undir 14 sekund.

Hennie Maria Reginsdóttir vísti heilt serlig evni í hæddarlopi og setti eitt dygt bólkamet

Maria Biskopstø hevur víst styrki í nógvum kappingargreinum. Hon átti longsta trístøkkið leygardagin

Allar myndir við takksemi læntar frá Hvirluni og Bjørg.