Home BETRI Vetrarkappingin TF VK-7 verður í Vági leygardagin

TF VK-7 verður í Vági leygardagin

by Guttorm Sørensen
Leygarmorgunin kl. 11.00 verður sjeynda og samstunds næstseinasta umfar í TF Vetrarkappingini runnið í Vági har Hvistan skipar fyri.hvistan-kapping

Teinurin í ár verður øðrvísi enn undanfarin ár, men rættiliga ymiskur og fjølbroyttur, soleiðis at Hvistan væntar at fáa ein góðan túr og góða kapping.Byrja verður vesturi á Eiðinum og runni verður framvið Vatninum og út til Tríkantin (á Sandinum) og tvørtur um Sandin og so vestur eftir Laksá. Tá ið komið er vestur aftur til Vatnið, verður farið einaferð runt Vatnið og síðani niðan í brekkur og heilt niðan til Vatnbrunnin omanfyri bygdina, brekkan er um 1,2 km. Tá ið komið er niðan har, verður undanbrekka út í bygdina, áðrenn stutt niðanbrekka er niðan í Geilina, sum er út gjøgnum alla bygdina, eftir sløttum. Við endan av Geilini verður snara niðaneftir og niðan á uppdyrkingarvegin, eisini nevndur Nervavegurin, ið er av grúsi, smágróti og grasi og er hesin vegur líka vestur til Viðarlundina, líka avbrotin av einum gili. Tá ið ein er komin vestur um Viðarlundina, er tað oman og tá ið vit so koma oman aftur á vegin, har vit fóru út í Geilina – so finna vit aftur á slóðina, hiðani vit komu og so retur aftur vestur á Vágseiðið.

Teinur fyri túrin er umleið 10km tí vit renna eina eyka ferð runt Vatnið.

Rutan sást á hesi leinkjuni: Rutan TF vk-7 Vágur

Kappast verður í hesum TF VK-bólkum og byrja allir bólkar samstundis kl. 11.00.

– Kvinnur / menn opin bólkur (f. -1999) – umleið 10 km
– Kvinnur veteranar / Menn Veteranar (f. 1961-1970) – umleið 10 km
– Kvinnur/Menn Superveteranar (f. 1960 ella fyrr) – umleið 10 km
– Kvinnuunglingar / Mansunglingar (f. 1995-1999) – umleið 10 km
– Gentur / Dreingir (f. 2000-2004) – umleið 3-4 km

Nummarútflýggjan og skifting verður í Ítróttarhøllini frá kl 10.00. Tilmelding fer fram á www.fif.fo inntil fríggjakvøldið 11. mars kl. 22.00. Kostnaður við tilmelding á netinum er kr. 50 fyri vaksin og kr. 20 fyri børn. Eisini kann meldast til á staðnum í seinasta lagi kl. 10.45, men tá er kostnaður kr. 100 fyri vaksin og kr. 50 fyri børn.Hvistan vónar at síggja nógv íðkandi  – eisini tey ið kanska ikki áður hava luttikið í vetrarkappingini – tí hetta er eisini ein frálíkur útferðardagur.

Umklæðing og brúsubað verður  í Ítróttarhøllini, har eisini okkurt ábit verður aftaná kappingina.

Heiðursmerkjahandanin verður á Hotel Bakkin í Vági kl. 14.00.Døgverði kann eisini bíleggjast við at skriva til finn@vilt.fo ella senda Finn Johannessen eini boð á facebook.

0 comment
0

Related Articles