Úrslit frá Suðuroy 25K

Á fyrsta sinni í Føroyum, varð hildin ein stór kapping í sonevndari náttarrenning, tá fleiri enn fýrati rennarar kl. 1 í leygarnáttina løgdu til brots av Vágseiði, við beinari kós móti vøllinum við Stórá í Trongisvági. Veðrið var gott, bert eitt lítið lot høgt.

Startskotið er latið av á Vágseiði og kósin verður sett móti vøllinum við Stórá í Trongisvági

Eitt serligt rennitiltak, ið Rørslufelagið Hvistan skipaði fyri. Byrjað varð við at renna eitt umfar um Vatnið. Síðan varð leiðin hildin út gjøgnum Vág og eftir landsvegnum, framvið Porkeri og Hov, upp um Hovsegg, framvið Øravík fyri síðan at enda á málinum við nýggja vøllin við Stórá í Trongisvági. Ein teinur uppá góðar 25 km.

Stórur dentur var lagdur á, at runnið varð undir tryggum kørmum, sjálvt um vegirnir vóru opnir fyri vanligari ferðslu. Mannaðir trygdarpostar við vatni og frukt, Suðuroyar syðra bjargingingarfelag við bilum og Rørslufelagið Hvistan við hjálparfólki og bilum gjørdu, at allir rennarir kundu kenna seg púra tryggar.

Jóhan, Jóhan M., Marlon, Magni, Eirikkur og Herluf rinda møðina eftir teir 25 kilometrarnar

Fyrstur á mál varð Guttorm Sørensen úr Treystinum við tíðini 1t 46m 41 sek. Honum í hølunum var Borgar Biskupstø úr Treystinum og triðjur á mál var Herluf Jacobsen úr Bragdinum. Hjá kvinnum varð Ann Thomsen fyrst, við tíðini 2t 09m 59 sek. Henni á baki var Tórvør Ø. Vang og Hergerð Heldarskarð allar tríggjar úr Bragdinum.

Á málinum var ymiskt gott at leska seg við eftir teir góðar 25 kilometrarnar. Eisini var fersk suppa og kaffi at fáa í ítróttarhøllini í Trongisvági, har heiðursmerkjahandanin eisini fór fram. Umleið kl. 05.00 løgdu flestu rennararnir leiðina heim ella umborð á Smyril at hvíla.

Tiltakið var sera væleydnað og sera væl fyriskipað av Hvistuni. Myndir eru at finna hesi leinkjuni: Myndir 25K 2012

Øll úrslitini eru at finna niðanfyri. Fyrst er eitt samlað yvirlit og síðani síggjast úrslitini í teimum ymsu bólkunum.