Tað gjørdist ein av teimum heilt stóru døgunum, tá 2. umfar av TF Stórkappingini varð hildið á Tórsbreyt leygardagin. Heili trý nýggj føroysk mett vórðu sett hendan dagin, og tað er so avgjørt ikki hvønndagskostur.

Í veruleikanum var talan um fýra met, tí Hanus Bergsson kastaði longu í fyrsta kastinum út um sítt egna føroyska met í spjótkasti, sum var 59,19 m. Fyrsta kastið var 60,47. Men í fimta kastinum gekk enn betur. Spjótið fleyg heilt út á 62,32 metrar. Og aftur í 6. umfari kastaði Hanus longur enn gamla føroyska metið.

Tað eru bara 10 mánaðir síðani at Hanus tók føroyska metið frá Rógva Højgaard, og hann hevur hetta stutta tíðarskeiðið lagt hálvan fimta metur afturat gamla metinum hjá Rógva. Hetta úrslitið er eitt sera sterkt úrslit, og Hanus hevur við sínum nýggja metið lagt seg á annað plássið á danska styrkilistanum. Heri Ziska, sum er venjari hjá Hanusi, metir at nógv er enn at heinta í okkara dugnaliga spjótkastara.

Hanus Bergsson hevur víst øgiliga styrki og framgongd í longri tíð. (mynd: Hvirlan (Bjørg))

Næsta metið kom á 200 metrum. Margit Weihe Fríðmundsdóttir tók í fjør metið frá Rebekku Fuglø, og hevur í vár betrað tað eina ferð. Tær báðar hittust so aftur leygardagin, og hóast Rebekka rann sína skjótastu 200 m tíð, var tað als ikki nokk at vinna á 16-ára gomlu Margit, sum rann sera væl og enn einaferð skar eitt fitt petti av egnum meti. Tíðin hjá Margit og nýggja føroyska metið er nú 27,21 sekund.

Margit Weihe Fríðmundsdóttir er betraði á øðrum sinni sítt egna føroska met á 200 m. Rebekka Fuglø í gulum og Rebecka M. Jørgensen í reyðum. (mynd: Hvirlan (Bjørg))

Triðja metið kom í hæddarlopi. Eisini í hesi greinini var tað metánarin sjálvur, sum setti metið. Men gamla metið hjá Ednu Mariu Debes  í hæddarlopi (147 cm) var nú longu blivið næstan trý ára gamalt, so tað var gott hjá Ednu Mariu loksins at taka tað einaferð afturat. Tað stóð nógv á, tí 144 cm kláraði hon ikki fyrr enn í triðju og seinastu royndini. Næsta hæddin var eftir ætlan 147 cm, men av tí at hon var einsamallur luttakari eftir í kappingini, og harvið vinnari, kundi hon sjálv avgera næstu hæddina, sum heilt natúrliga bleiv 148 cm – 1 cm yvir føroyska metið. Tað gekk ikki fyrstu ferð, men í aðru royndini sníkti hon seg sera neyvt upp um. Hon royndi so aftur 150 cm, men her miseydnaðust allar tríggjar royndirnar. Men sigurin og metið var í skjáttuni.

Edna Maria Debes smýgur sær upp um tvørstongina og setir nýtt føroyskt met í hæddarlopi. Gamla metið átti hon sjálv. (mynd: Hvirlan (Bjørg))

Við hesum trimum metunum, vóru tað tey eldru, sum stjólu myndina. Men vit fingu eisini fleiri ómtatliga góð úrslit hjá børnunum. Øll úrslitini standa her undir, og nógvar myndir eru at finna á heimasíðuni hjá Hvirluni.