Í einum lopi niðan á Sornfelli

Kanska eitt sindur yvirdrivið, men tað tóktist, sum leyp Marnar Djurhuus í einum lopið úr Kollafjarðardai niðan á Sornfelli, tá Bragdið leygardagin skipaði fyri 11. Top Run kappingini, ella fyrstu Bragdið Top Run, sum kappingin nú fer at eita. Hetta tí at Mjørkadals Ítróttarfelag saman við radarastøðini er farið í søguna. Renningin hevur tó verið so væl umtókt, at Bragdið heldur fram við fyriskipanini.

Men aftur til Marnar Djurhuus, sum rann Top Run á fyrsta sinni. Mundi hann fara at taka metið hjá Sigurði Justinussen? Og mundi Rigmor N. Arge fara at taka metið aftur, sum hon misti til Valborg Heinesen í fjør? Tað var uppfinnarin av Top Run, Henning Kørvel, sum skeyt renningina í gongd. Um hann rakti Marnar í dintilin, veit eg ikki. Í øllum førum varð hann sum skotin úr einari kanón, og legði seg eftir bert heilt lítlari løtu klárt á odda. Frástøðan vaks og vaks allan vegin. Ikki fyrr enn allarseinasta strekkið í mótvindinum niðan móti málinum byrjaði møði at síggjast á Marnari, men tá hevði hann longu gjørt sítt arbeiði til fulnar. Úrslitið varð, at hann næstan skar tveir heilar minuttir av metinum. Heilar seks minuttir var hann frammanfyri mr. Top Run, Sam Vang, sum hevur vunnið kappingina sjey ferðir. Regin Zachariasen plagar eisini at renna væl til Top Run, og aftur í ár megnaði hann at renna seg til eitt samlað triðja pláss.

Rigmor rann eisini væl, og hon helt nøkulunda ætlaðu ferðina. Tó gjørdu umstøðurnar móti endanum við nógvum mótvindi og regni, at metið ikki kom í hús. Hvirlan bleiv bæði nr. eitt og tvey hjá kvinnum, tí Birna Mohr Joensen rann seg á eitt flott silvurpláss. Hergerð Heldarskarð úr Bragdinum kom á mál sum nummar trý.

    
1. Marnar Djurhuus í stórformi leygardagin. 2. Ólavur Egholm stríðist við Sam Vang og Henry í reyðum. 3. Regin Zachariasen vísti styrki í brattanum. 4 +5 Birita og Beinta stríddu seg niðan, men høvdu kortini kreftir eftir til ein swing-om við formanninum leygarkvøldið 🙂