Rebekka vann Flaggdagin 6. árið á rað

Tað lá næstan í kortunum, at Treysti fór at gera ein tripp-trapp-Treysti á Flaggdegnum. Rebekka Fuglø hevur ongantíð runnið betur á longu teinunum enn hesa seinastu tíðina, og við fimm Flaggdagssigrum rað, var hon eisini favorittur at vinna tann sætta. 13 ára gamla Maria Biskopstø hevur leingi verið ein av okkara allarbestu langteinarennarum. Men er ikki so ofta sloppin at prógva tað, tí hon enn er ov ung til at renna móti teimum vaksnu. Men í ár slapp hon so, og spennandi var, hvussu hon fór at roynast. Eisini 14 ára gamla Oddvør Josephsen, sum bleiv nummar tvey í fjør, varð spádd at enda í oddinum.

Kvinnurnar løgdu hart út og fylgja væl við fleiri av sterku monnunum. F.v.: Ein hálvur Martin Gravesen, Rógvi Kárason, Gunnar Sivertsen, Rebekka Fuglø, Dánjal Dahl Ljósheim, Niels Poulsen, Henry Olsen, Regin Thomsen og Maria Biskopstø.

Rebekka rann enn einaferð upp til sítt allarbesta, og kom á mál við hennara bestu Flaggdagstíð. Bert einar 100 metrar aftanfyri kom unga Maria Biskopstø. Men ein sera vælrennandi Rigmor N. Arge spilti spælið fyri Treysti. Hvirlu-kvinna nummar eitt hevði ein av sínum heilt góðu døgum, og rann ein minutt skjótari enn í fjør, og fekk eitt trygt triðjapláss. Oddvør hevði ein heldur ringan dag, og rann væl seinni enn í fjør. Í einum spurti megnaði hon at renna seg á fjórðaplássið, beint frammanfyri Anniku Thomsen.

Úrslitið í opna bólkinum við kvinnum, Flaggdagin 2016