Støðan í Vetrarkappingini eftir fjórða umfar

Nú er samlaða støðan í Vetrarkappingnini eftir fjórða umfar, sum var í Hvannasundi leygardagin, uppgjørd. Í opnu bólkunum eru tað Marnar Djurhuus og Rebekka Fuglø, sum liggja á odda. Marnar hevur vunnið allar fýra kappingarnar hann hevur runnið, og hevur tí longu tryggjað sær samlaða sigurin. Hann hevur í løtuni 153 stig. Annaðplássið hevur Hallur Holm mestsum tryggjað sær eisini. Einasti í kann taka tað frá Halluri, er Guttorm Sørensen, men so er treytin, at hann vinnur seinastu kapping, og tað er lítið sannlíkt.

 
Marnar Djuhuus og Rebekka Fuglø liggja á odda í opnu bólkunum

Hjá kvinnunum er mestsum eingin spenningur um fyrstu plássini. Rebekka hevur runnið tríggjar kappingar, vunnið allar og hevur sostatt 150 stig. Duruta á L. Reginsdóttir hevur vunnið eina og trý onnurpláss. Tað gevur henni, íroknað 3 bonusstig fyri 4 kappingar, 147 stig. Rebekka skal bert gjøgnumføra seinastu kapping og fáa 3 bonusstig fyri at vinna samlað. Triðjaplássið fer til Tórvør Ø. Vang, sum hevur tryggjað sær 138 stig.

Hjá veteranunum er háspenningur um bæði fyrsta og annaðpláss og eisini um triðjaplássið. Tað eru Borgar Biskopstø og Henry Olsen í dystast um fyrsta og annaðpláss. Borgar liggur á odda við 150 stigum frammanfyri Henry við 147 stigum. Borgar kann í mesta lagi fáa 3 bonusstig afturat og samlað 153 stig. Um Henry vinnur seinasta umfar og fær 2 bonusstig afturat, so kemur hann uppá 152 stig.

Slagið um triðjaplássið er ímillum Jóhan M. Jacobsen við 136 stigum og Debes H. Christiansen við 134 stigum. Jóhan var frammafyri Debes tvær tær fyrstu kappingarnar, men tvær tær seinastu hevur Debes verið frammanfyri. So har er lagt upp til ein sera spennandi tvídyst í Várkappingini. John Egholm hevur 90 stig fyri tvær kappingar, og kann blanda seg uppí dystin um triðjapláss.

 
Jóhan M. Jacobsen og Debes H. Christiansen eru sera tættir á triðjaplássi

Veterankvinnurnar hava onki avgjørt enn. Ella Áarstein liggur á odda við 150 stigum fyri fýra kappingar. Rennir hon seinasta umfar og fær 2 bonusstig, so kemur hon uppá 152 stig. Tað kann verða nokk til at fáa samlaða sigurin. Karin K. Petersen liggur nummar tvey við 142 stigum fyri fýra kappingar. Laila Jacobsen hevur 129 stig fyri tríggjar kappingar. Men, men Ann Thomsen hevur 100 stig fyri tvær kappingar, og hevur sostatt møguleika at renna seg uppá sigursskammilin. Tað er treytað av at hon luttekur í Várkappingini og fær nógv stig.

Ella Áarstein er fremst hjá veterankvinnum

Jens R. Weihe hevur longu vunnið sær fyrstaplássið hjá Superveteranunum við 153 stigum. Nummar tvey í løtuni er Tummas Joensen við 142 stigum. Næstir eru Jóannes Ortind við 134 stigum og Gunnar Simonsen við 133 stigum. Her er eisini eitt men. Óli Olsen hevur 97 stig fyri tvær kappingar, og hevur sostatt enn møguleika at taka annaðplássið.

Jens R. Weihe hevur longu vunnið sín superveteranbólk

Kvinnuunglingur er bert ein og tað er Rebekka Fuglø. Marnar Djurhuus hevur longu vunnið bólkin hjá mansunglingum við fullum stigatali 153 higartil. Einar Gregersen og Regin Joensen eru púra javnir við 135 stigum á øðrum- og triðjaplássi. So har er lagt upp til spennandi uppgerð í Várkappingini. Rúni Seloy hevur 94 stig fyri tvær kappingar, og hevur sostatt møguleika at gera seg galdandi í kappingini um annað- og triðjapláss.

Regin Joensen og Einar Gregersen eru liggja javnir 

Teitur Bjarnastein og Gunnar Sivertsen eru javnir við 147 stigum í dreingjabólkinum. Tann fremri av teimum í Várkappingini fer við samlaða sigrinum. Triðjapláss verður avgjørt ímillum Steingrím Hallsson og Rógva Johansen.

Gunnar Sivertsen og Teitur Bjarnastein eru javnir á fyrstaplássi við 147 stigum

Gentubólkin hevur Sára Debesardóttir vunnið, meðan Hildur Poulsen kann blíva nummar tvey.

Sára Debesardóttir hevur vunnið gentubólkin

Fimta og seinasta umfar í Vetrarkappingini verður í Runavík tann 24. mars, tá árliga Várkappingin verður.

Samlaða støðan er at finna her niðanfyri.

Vetrarkappingin 2011/2012

Samlaða einstaklingakappingin verður avgjørd eftir trimum av teimum bestu teljandi umførunum, sum rennarin hevur fingið. Stigini verða latin soleiðis: 50,47,45,43,41,40,39,38,37,36,35 osfr. Harumframt vera latin 3 bonusstig fyri at hava luttikið í 4 kappingum, og 2 bonusstig afturat fyri at hava luttikið í 5 kappingum.