Andrias og Rebekka vunnu á Fossánesi

Andrias Hansen úr Bragdið og Rebekka Fuglø úr Treysti sigraðu í opnu bólkunum, tá Treysti í dag skipaði fyri 6. umfari av TF Vetrarkappingini á Fossánesi. Teinurin var umleið 8,8km og varð runnið bæði á Borðoynni og Viðoynni. Tað var frammaundan lagt upp til eina spennandi kapping hjá monnunum ímillum Andrias Hansen, Eirik Hansen og Julian Gregersen. Teir tríggir fylgdust í oddinum líka til tað restaði umleið ein kilometur, men tá trektu Hansen-brøðurin frá Julian. Andrias varð tann fyrsti á mál og vann við 30,39 minuttir, bert fimm sekund frammanfyri bróðurin Eirik. Julian setti ferðina niður og kom tryggur á mál á triðjaplássi við 31,25 minuttir. Julian vann samstundis mansunglingabólkin frammanfyri Dánjal D. Ljósheim, sum hevur runnið væl í vetur og gjørdist nummar fýra í opna bólkinum.

Julian Gregersen (41), Andrias Hansen (39) og Eirikur Hansen (38) fylgdust heilt leingi

Hjá kvinnunum gjørdi ongin nakað við Rebekku Fuglø, sum vann rættiliga tryggan sigur við 34,19 min. Hálvur minuttir var ímillum nummar tvey og trý, sum gjørdust Hergerð Heldarskarð úr Bragdið við 38,59 min. og Birna Mohr Joensen úr Hvirluni við 38,59 min.

Rebekka vann hjá kvinnum og Hjalmar Sjóvará (10) vann veteranbólkin frammanfyri Jóhan (hómast aftanfyri Hallur) og Hallur

Í veteranbólkinum hjá monnum varð tætt í oddinum, men vinnari bleiv Hjalmar Sjóvará við 34,14 min. frammanfyri Jóhan E. Simonsen og Hallur Holm við ávikavist 34,21 min. og 34,2 min. Hjá veterankvinnunum vann Hergerð Heldarskarð við 38,29 min. frammanfyri Birnu M. Joensen við 38,59 min. og Eydnu Weihe við 42,31 min.

Hergerð hevur víst góðan form í vetur og vann veteranbólkin frammanfyri Birnu, sum hómast beint aftanfyri aftanfyri

Hjá superveteranmonnum vann  Páll Vesturbú frammanfyri Kára Simonsen og Theodor A. Olsen og hjá kvinnunum var tað Sunneva Olsen, sum kom fyrst á mál frammanfyri Annu Sofíu Kristiansen og Jóngerð Herup Olsen.

Páll Vesturbú sigraði í superveteranbólkinum

Sunneva Olsen vann sín superveteranbólk

Oddvør Josephsen vann gentubólkin hesuferð frammanfyri Mariu Biskopstø og Rutt Gregersen

Hans Erland Thomsen (12) vann dreingjabólkin frammanfyri Hans Sivertsen (9) og Inga Johannesen (32)

Niðanfyri eru myndir av heiðursmerkjavinnarunum á Fossánesi í dag.

Gentur: Oddvør Josehpsen og Rutt Gregersen. Maria Biskopstø væntar á myndini

Dreingir: Hans Sivertsen, Hans Erland Thomsen og Ingi Johannesen

Mansunglingar: Dánjal D. Ljósheim og Julian Gregersen

Superveterankvinnur: Anna Sofía Kristiansen, Sunneva Olsen og Jóngerð H. Høgnesen

Superveteranmenn: Kári Simonsen, Páll Vesturbú og Theodor A. Olsen

Veterankvinnur: Birna M. Joensen, Hergerð Heldarskarð og Eydna Weihe

Veteranmenn: Jóhan E. Simonsen, Hjalmar Sjóvará og Hallur Holm

Kvinnur opin bólkur: Hergerð Heldarskarð, Rebekka Fuglø og Birna M. Joensen

Menn opin bólkur: Eirikur Hansen, Andrias Hansen og Julian Gregersen

Næsta umfar verður suðuri í Trongisvági komandi leygardag og tá byrjar renningin kl. 10.15.

Myndirnar hevur Jóannes N. Poulsen tikið. Leinkja til fleiri myndir er her: TF VK-6 Fossánes 2017

Øll úrslitini frá Fossánesi síggjast her niðanfyri.