Jan Elmar og Rigmor vunnu FM hálvmaraton

Tá Treysti fyrr í mánaðinum skipaði fyri FM í hálvmaraton í Klaksvík, vóru tað tey bæði Jan Elmar Sørensen úr Treysti og Rigmor N. Arge úr Hvirluni, sum blivu føroyameistarar á rutuni, sum nú er broytt nakað í mun til undanfarin ár, so hon er flatari og fýra umfør á 5,275 km, í mun til trý  umfør á góðar 7 km undanfarin ár. Startur og mál eru eisini flutt.

Starturin

Tey bæði vóru eisini undan kappingini favorittar. Men Jan Elmar, sum rann eina góða hálvmaratonkapping í Cardiff á páskum, har hann kláraði OYL-kravtíðina, kundi kortini vænta sær harða kapping frá brøðrunum Eiriki og Andrias Hansen úr Bragdið, sum ætlaðu at kneyka Oyggjaleikakravtíðina, sum er 1 tími og 15 minuttir. Eirikur rann fyrst í mánaðinum BT-halvmaraton í Lyngby uppá 1.15.59 og Andrias hevur víst góðan form í vetur og tikið seg fram.

Ætlanin var at danski stórrennarin Henrik Them, skuldi hjálpa teimum, men vegna mjadnaskaða, so fekk hann tíverri ikki hjálpt teimum á mál við hesum, og varð stórur ivi um hvussu leingi hann fekk runnið við.

Henrik Them, Andrias Hansen, Eirikur Hansen og Jan Elmar Sørensen

Á broyttu rutuni skuldu rennast fýra umfør á knappar 5,3 km. Eftir fyrsta umfar lógu teir fýra púra javnir, men eftir næsta umfar var Jan Elmar leysur frá Eiriki, sum eisini var leysur frá Andrias, meðan Henrik Them mátti gevast vegna skaðan. Tað hálvrunnið var, lógu Jan Elmar, Eirikur og Andrias allir nakað undir kravtíðina, so tað sá ógvuliga spennandi út hvussu leikur spældi av seinnu hálvu.

Á triðja umfari hevði Jan Elmar økt sína leiðslu og var hann nú knappan minutt frammafyri Eirik, sum framvegis lá undir kravtíðina, meðan Andrias var líka omanfyri.

Jan Elmar helt sina leiðslu á mál, sjálvt um ferðin hjá honum fór nakað niður, og gjørdist hann sostatt á fyrsta sinni føroyameistari í hálvmaraton, við tíðini 1.14.03 tímar, sum bert er átta sekund seinni enn hann rann í Cardiff, men kortini væl undir kravtíðina.

Stórur spenningur var nú hvussu útfallið hjá Eiriki og Andrias bleiv, men tíverri so bleiv tíðin á Eiriki á øðrumplássi 1.15.12, bert 12 sekund omanfyri kravtíðina, men hann setti kortini persónligt met á teininum. Hjá Andriasi á triðjaplássi bleiv tíðin 1.15.36 sekund.

Ungi Treystarennarin Julian Gregersen gjørdist nummar fýra við persónligum meti, sum nú er 1.18.06, frammanfyri FM-vinnaran frá seinast, Martin Gravesen úr Bragdið, sum eisini setti persónligt met á fimtaplássi við 1.18.21. Martin vann veteranbólkin frammanfyri Henry Olsen úr Bragdið við 1.20.49 og Heina Gregersen úr Treysti við 1.25.32.

Julian Gregersen og Martin Gravesen

Hjá kvinnunum var tað aftur Rigmor N. Arge úr Hvirluni, sum legði seg á odda frá byrjan og hon økti leiðsluna støðugt fyri hvørt umfar, og bleiv hon tryggur føroyameistari við tíðini 1.31.13. Kappingin um annað- og triðjapláss, sum varð ímillum Astrid Joensen úr Roysnið og Birnu M. Joensen úr Hvirluni bleiv haraftur ímóti sera spennandi. Tað bleiv ongantíð stórur munur ímillum tær, og tá tær fóru út á seinasta umfar, var Birna bert einar 70-80 metrar frammanfyri. Orkan gekk undan hjá Birnu, meðan Astrid rann væl seinasta umfar, og fór framvið Birnu og tryggjaði sær silvurheiðursmerkið við 1.39.08. Birna á triðjaplássi kom á mál við tíðini 1.39.58. Tær tríggjar blivu eisini fremstu veterankvinnur á mál.

Fremstu kvinnur í bæði opna- og veteranbólkinum f.v: Astrid Joensen, Rigmor N. Arge og Birna M. Joensen

Hjá superveteranunum var tað enn einaferð “suvereni” Jens R. Weihe úr Frælsi, sum kom fyrstur um málstrikuna. Tíðin hjá honum bleiv 1.28.54. Á næstu plássunum varð tað eina løtu til kapping ímillum Jósvein H. Olsen úr Bragdið og Rana Nolsøe úr Treysti, men á seinnu hálvu dróg Jósvein frá og gjørdist nummar tvey við 1.33.41, meðan Rani á triðjaplássi kom á mál við tíðini 1.35.09.

Jens R. Weihe (76) vann enn eitt FM-heiti í superveteranbólkinum

Hjá kvinnuligu superveteranunum gjørdist Sunneva Olsen vinnari við 1.54.40, frammanfyri Elisabeth Rasmussen við 1.59.29 og Jessi Hansen við 2.14.56. Tær umboða allar Bragdið.

Rennararnir á veg norður eftir Nólsoyar Pálsgøtu beint eftir startin

Myndirnar hevur Jóannes N. Poulsen tikið.

ÚRSLIT FM HÁLVMARATON 2016