Í gjár skipaði Frælsi fyri fjórða umfari í Betri vetrarkappingini í Sørvági. Teinurin var umleið 9,8 km. Líkindini vóru bara heilt góð, hóast eitt sindur skiftandi av vindi var. 65 vælupplagdir rennarar vóru tilreiðar tá byrjað bleiv kl. 11.00.

Rennast skuldi nakað forbí Bø, og so nakað niðan í brøttu brekkuna at venda. Útleggið í oddinum varð nokkso varligt og fylgdust fleiri beint áðrenn komið bleiv til Bíggjar. Tá setti ungi maðurin úr Sandavági, Hanus í Horni Nielsen úr Frælsi, ferð á og slapp avgerandi leysur og helt leiðsluna á mál. Hanus gjørdist nummar trý í Nýggjárhálvmaraton í ár, og hevur hann eisini víst sínar rennidygdir í Seyðamannarenningum á Vestanstevnu. Spennandi verður at fylgja honum framyvir.

Ávegis heimaftur beint eftir Bø. Hanus klárt á odda og Sam nummar tvey. Hinir fýra eru púra javnir. (Mynd: jn.fo)

Veteranurin Sam Vang úr Bragdið bleiv nummar tvey og á triðja plássi kom eitt sindur óvæntað Steffan K. Poulsen úr Treysti. Steffan luttók ikki í fyrsta umfari vegna skaða, men hevur tikið seg spakuliga fram síðani annð umfar, tá hann gjørdist nummar sjey. Einar Gregersen, sum vann seinasta umfar, hevði ligið sjúkur alla vikuna, men gjørdist kortini nummar fýra.

Hjá monnunum er veruligur spenningur í oddinum í samlaðu Betri Vetrarkappingini. Støðan eftir fýra umfør verður løgd út ein av komandi døgunum.

Útleggið var varligt (mynd: jn.fo)

Hjá kvinnunum stóð kappingin hesaferð ímillum Maritu Andrasardóttir úr Hvirluni og Sarah Vallin úr Bragdinum. Marita var nakrar metrar frammanfyri tað mesta av teininum, men tá tær nærkaðust málinum fór Sarah framum og vann. Á triðaplássi kom Hergerð Heldarskarð úr Bragdinum.

Sarah Vallin lá leingi á øðrumplássi (mynd: jn.fo)

Sam hevur lagt seg á annaðpláss (mynd: jn.fo)

Myndir frá renningini er at síggja á jn.fo: Betri VK-4

Øll úrslitini eru at finna niðanfyri.

Fimta umfar verður 9. februar, tá FM í Lendisrenning verður hildið í Hoydølum.

Úrslit Betri VK-4 í Sørvági 26. januar 2019 kl. 11.00