Avgjørdu Rebekka og Jan Elmar TF Vetrarkappingina?

Í dag varð sætta umfar av TF Vetrarkappingini runnið. Hesaferð heilt norðuri á Fossánesi. Fjarskotið sjálvt eftir føroyskum mátistokki, men kortini við fleiri rennarum á heimavølli. Norðdepli og Hvannasund eiga sín part av føroysku rennisøguni. Veðrið, sum fyrr í vikuna sá út til at fara at skikka sær av tí fræga, lurtar neyvan eftir veðurtíðindunum. Tað livir sítt egna lív, og tað hevðis sínar avbjóðingar við sær tí dag. Í morgun vaknaðu vit til kava, og meðan sjálv renningin fór fram, var til tíðir kavarok.

Hóast okkurt óhapp var, komu allir 86 rennararnir so nøkulunda heilskapaðir um mállinjuna.

Jan Elmar tryggjaði sær enn ein sigur í ársins vetrarkapping

Spenning um fremstu plássini fingu vit ikki í dag. Í øllum førum ikki í opnu bólkunum, har bæði Rebekka Fuglø og Jan Elmar Sørensen vunnu tryggar sigrar. Rebekka legði seg greitt á odda longur eftir fyrsta av teimum fýra umførunum, meðan Jan Elmar skræddi seg leysan frá Julian Gregersen, tá teir høvdu runnið nakað meira enn hálva leið. Eirikur Hansen fylgdi við fyrsta umfar, men hann hevði ikki skógvar til lendispartin av rutuni, og misti tá hvørja ferð eina rúgvu av dýrabarum sekundum.

Andrias vísti at formurin er góður og rann seg til eitt flott triðjapláss

Andrias Hansen tekur seg alsamt fram, og í dag fór hann fram um Eirik á seinasta umfarinum, og móti endanum var hann heldur ikki langt aftanfyri Julian, sum mátti venda sær á nakrar ferðir, tá hann merkti trýsti frá Andriasi. Greiður sigur til Jan Elmar, Julian varðveitti annað plássið, og Andrias á pallinum fyri fyrstu ferð í vetur.

Rebekka vísir betri form enn nakrantíð, nú bert ein vika er til DM innandura

Rebekka rann sum sagt tryggan sigur í hús á heimavøllinum. Krista Nielsen úr Bragdinum var fremsta kvinna eftir fyrsta umfar, men eins og í Hoydølum, kom Rigmor N. Arge úr Hvirluni seint, men sikkurt fram á og fram við henni. Krista megnaði tó enn einaferð at halda Durutu R. á Lofti aftanfyri seg, og vísa henni aftur á fjórða pláss.

Krista og Rigmor stríddust um annað og triðjapláss í dag, men Rigmor gjørdist tann drúgvara

Tær tríggjar Rigmor, Krista og Duruta eiga tó enn sum áður sætið á sigurspallinum hjá veterankvinnunum. Hjá monnunum skiftir eitt sindur við fólki á pallinum. Seinast sóu vit aftur Marnar Pattinson á pallinum eftir bronsukrónuni, og í dag slapp hann so enn longur upp við at gerast nummar tvey í dagsins kapping. Nýggjur á pallinum í dag var Regin Áki Hansen, hvørs áttanda pláss í opna bólkinum var nóg mikið til veteranbronsu. Altíð gott at síggja nýtt fólk á sigurspallinum. Ovasta mannin hava vit longu sæð fleiri ferðir fyrr. Sterki Martin Gravesen vann veteranbólkin trygt, og rann seg eisini til eitt trygt fimtapláss í opna bólkinum.

Cecilia kempaði hart og rann seg til ein sigur í dag

Tann allar harðasta kappingin í dag stóð millum fremstu kvinnurnar hjá superveteranum. Cecilie Arendal og Elisabeth Rasmussen skiftust um at føra, og tað sást týðiliga, at tær vildu gera alt fyri at vinna. Tað endaði tó við, at Cecilie gjørdist tann drúgvara, men ikki var langt aftur til Elisabeth, sum fyri fyrstu ferð fær silvur. Á triðja plássi kom Jóngerð Høgnesen.

Jens í vælkendum stíli og vann enn ein tryggan sigur

Heldur ikki í dag kundi nakar skala superveteranin Jens R. Weihe, sum nú hevur verið ósigraður rættiliga leingi. Rani Nolsøe var við aftur í dag, eftir at hava mist tvey umfør. Hann gjørdi sum hann plagdi, og tók sær av silvurmerkinum. Á triðjaplássi kom Bent H. Jakobsen, sum hevur hug at ota seg alt longur og longur fram.

Maria og Oddvør fylgdust størsta partin av teininum, men Oddvør gjørdist vinnari

Hjá gentunum fingu vit ein nýggjan vinnara seinast, tá Oddvør Josephsen basti Mariu Biskopstø. Spurningurin var so, um hetta kundi henda einaferð afturat á 3,5 km langa og harða teininum. Maria hevur verið sjúk seinastu tíðina, og tað var tí ikki so óvæntað, at ein væl rennandi Oddvør enn einaferð fór fyrst um málið. Maria var tó beint aftanfyri. Tað bleiv aftur í dag til ein tripp-trapp-Treysti, tí á triðja plássi kom Elin Kristina Ryan pressandi.

 
Dánjal vann enn ein tryggan sigur, meðan Hans bleiv nummar tvey á heimavølli

Hans Sivertsen var eisini á heimavølli í dag. Hann hevur í vetur vunnið eina kapping, og skuldi hann vinna aftur á sterka mótstøðumanninum Dánjali Dahl Ljósheim, skuldi tað helst latið seg gjørt á heimavøllinum, har fýra ferðir skuldi rennast fram við sínum egna heimi. Men Dánjal er sera sterkur í løtuni, og tað sær ikki út til, at nakar tekur hann aftur í vetur. Dánjal vann aftur tryggan sigur í dag. Eins og Hans ikki fær fatur á Dánjali, hevur Hans Erland Thomsen eisini trupult at fáa fatur á Hansi. Hans Erland bleiv aftur í dag nummar trý, júst sum øll hini umførini síðani 2. plássið Runt Agnið.

 
Tað gjørdist sera stríggi hjá øllum at koma niðan á Múlavegin

Dagsins ruta var sera tung at renna, og við kava á jørðini og kavaroki í luftini gjørdist alt enn tyngri. Tí var tað ein fragd fyri eygað at síggja allar luttakararnar leggja so nógv fyri  og leggja alla megi í at gera sítt besta. Man er sanniliga stoltur av at vera millum vetrarrennararnar.

Fleiri myndir, sum Jóannes N. Poulsen tók, eru at finna her: TF VK-6 Fossánes 2016

Úrslit TF VK-6 Fossánes 20. februar 2016 kl. 11.00