TF VK-3: Marnar og Bjørk í einum flokki fyri seg

Útsetta 3.umfar í TF Vetrarkappingin, sum skuldi rennast í Havn seinasta leygardag, bleiv avgreitt í bestu líkindum í gjár. Yvir 70 rennarar vóru við. Tey vaksnu runnu umleið 10,6 km og børnini 3,5 km.

Niðurteljingin er liðug og allir rennararnir spenna avstað  (mynd: Einar Vang)

Hjá monnunum var tað Marnar Djurhuus, sum setti alla mótstøðu langt til viks beinanvegin. Hann legði seg klárt á odda beinanvegin og økti støðugt munin aftur til nærmastu kappingarneytarnar, sum vóru Eirikur Hansen og Sam Vang á næstu plássunum. Sam mátti nokkso tíðliga sleppa Eiriki, sum kom at liggja einsamallur á øðrumplássi og so Sam á triðjaplássi, sum teir hildu á mál. Aftanfyri varð ein harður dystur millum Henry Olsen, Jan Elmar Sørensen og Einar Gregersen, sum heldur ikki kundu føla seg ov tryggar tí Hallur Holm og Teitur Bjarnastein runnu væl aftanfyri teir. Men úrslitið bleiv at Henry varð fyrstur av teimum frammanfyri Einar, Jan Elmar, Teitur og Hallur. So var eitt glopp aftur til Regin Thomsen og Jóhan M. Jacobsen. 

Marnar rann púra einsamallur allar 10,6 kilometrarnar (mynd: Einar Vang)

Sostatt vóru tað Marnar, Eirikur og Sam í vóru fyrstir í opna bólkinum, Henry, Hallur og Jóhan M. í veteranbólkinum, Marnar, Einar og Teitur í mansunglingabólkinum. Superveteranbólkin vann Jens R. Weihe frammanfyri Jósvein H. Olsen og Gunnar Simonsen.

Bjørk megnaði at fylgja hesum og enntá renna frá onkrum (mynd: Einar Vang)

Var Marnar suverenur vinnari hjá monnunum so var Bjørk H. Olsen sanniliga eisini suverenur vinnari hjá kvinnunum. Hon vann ein tryggan sigur frammanfyri Rebekku Fuglø og Rigmor N. Arge, sum hevði vunnið bæði undanfarnu umførini. Skjótastu kvinnuveteranar vóru Ann Thomsen, Astrid Joensen og Anna Maria Seloy.

Dreingjabólkin vann Gunnar Sivertsen frammanfyri Rúna Skarðhamar og Dánjal D. Ljósheim. Í gentubólkinum vóru tað tær tríggjar Treystagenturnar Oddvør Josephsen, Maria Biskopstø og Elin Kristina Ryan í vóru fremstar.

Øll úrslitini eru at finna niðanfyri.

Myndir, sum Einar Vang tók, eru at finna her.

Støðurnar í teimum ymsubólkunum verða eisini lagdir út heilt skjótt. Næsta umfar í TF Vetrarkappingini verður leygardagin 11. januar næsta ár í Sørvági.