Startlistar til 3. Grand Prix á breyt fríggjakvøldið

Startlistar til 3. og seinasta Grand Prix á breyt, sum Treysti fyriskipar á Tórsbreyt fríggjadagin kl. 18.30, eru nú klárir. Hesuferð eru 301 startir tilmeldaðir, og tað er nakrir fleiri enn seinast. Luttakaratalið hesuferð er 115, so tað er aftur talan um góða undirtøku.Hetta er so  3. og seinasta umfar, og í fleiri kappingum er onki avgjørt enn, so lagt er upp til nakrar spennandi kappingar fríggjakvøldið.

Støðurnar í spurti, miðteini, lopi og kasti í teimum ymsu bólkunum, undan kappingunum fríggjakvøldið, eru at finna í aðrari grein her á heimasíðuni.

Tey bæði undanfarnu umførini eru føroysk met sett og ein rúgva av bólkametum, so tað verður spennandi at gera upp eftir loknar kappingar.

Landsliðið hjá FÍF fer til VU-Spelen í Gøteborg næsta vikuskifti við 22 íðkarum, og skulu teir allir royna seg fríggjakvøldið, har eisini onkrir oyggjaleikaluttakarar vera við.

Kappingarnar væntast at taka umleið 3 tímar at avgreiða. Leygardagin frá kl. 16.00 skipar FÍF fyri “Afterparty”, í hølunum hjá Starvsmannafelagnum, har heiðursmerkini verða handaði og borðhald eisini verður. Um ein ætlar við til borðhaldið, so skal meldast til undir TILMELDING her á síðuni.

Tíðarætlanin kemur út í seinasta lagi mikukvøldið.