Úrslitini frá TF VK-4 í Sørvági í morgun

Líkindini vóru ikki av teimum bestu tá fjórða umfar í TF Vetrarkappinini bleiv avgreitt í Sørvági fyrrapartin av Frælsi. Rennast skuldu umleið 8,6 kilometrar, frá kirkjuni í Sørvági út til Bíggjar omanfyri bygdina og útum, og so heimaftur gjøgnum Bø og so til málið við kirkjuna. Eitt kalt og strævi lot inneftir Sørvágsfirði, gjørdi at runnið bleiv við lágari ferð úteftir at venda.

Hóast vátaslettingur og okkurt heglingsælið møttu rennarunum meðan teir koyrdu vestur, so var onki avfall meðan sjálv renningin bleiv avgreidd, men beint eftir at seinasti rennarin fór um málstrikuna, ja so kom aftur eitt heglingsæl.

Tað var næstan sum at sígga eina súklukapping, tí nógvir rennarar lógu í bólkum uppá “hjul” hjá øðrum í nógva mótvindinum. Heimaftur broyttist alt. Ferðin bleiv munandi økt og mestsum ongin fylgdist.

Soleiðis sá tað eina fylgi út í nógva mótvindinum (mynd: jn.fo)

Hóast vána veðrið so vóru tað heili 84 rennarar, sum møttu upp og gjøgnumførdu, og tað er mesta nøgd av rennarum nakrantíð síðana Vetrarkappingin byrjaði.

Eftir kappingina bjóðaði Frælsi, sum kom sera væl frá fyriskipanini av tiltakinum, heita suppu og kaffi/te í SÍ-húsinum, og tað mundi koma væl við hjá øllum, bæði rennarum og fyriskiparum.

Vinnari hjá monnum bleiv enn einaferð Marnar Djurhuus. Honum á baki komu Sam Vang og Eirikur Hansen. Hjá kvinnunum varð tað aftur hesuferð Bjørk Herup Olsen, sum kom fyrst á mál. Síðani komu Rebekka Fuglø og Rigmor N. Arge. 

Veteranbólkin vann enn einaferð Henry Olsen, men munurin tykist tódna fyri hvørt umfar aftur til Hall Holm bleiv nummar tvey aftur hesuferð. Súni Jacobsen kom á mál sum nummar trý.

Ann Thomsen varð fyrsta veterankvinna á mál. Síðani komu Astrid Joensen og Hergerð Heldarskarð.

67-ára gamli Jens R. Weihe, sum er suverenur í superveteranbólkinum, vann aftur fyrrapartin, Nummar tvey gjørdist Jósvein Herup Olsen, meðan Gunnar Simonsen bleiv nummar trý.

Unglingabólkarnar vunnu Marnar Djurhuus og Rebekka Fuglø, meðan Gunnar Sivertsen og Maria Biskopstø vunnu dreingja- og gentubólkin.

Fimta umfar í TF Vetrarkappingini verður avgreitt í samband við FM í crossrenning, sum verður í Hoydølum leygardagin 1. februar.

Leinkja til myndir á heimasíðuni www.jn.fo er her

Øll úrslitini eru at finna niðanfyri. Samlaða støðan í TF Vetrarkappingini kemur á heimasíðuna ein av fyrstu døgunum.