Hallur og Rebekka vunnu FM í lendisrenning

Hallur Holm úr Bragdinum og Rebekka Fuglø úr Treysti vunnu í morgun FM í Lendisrenning, tá Bragdið skipaði fyri 5. umfari í TF Vetrarkappingini í Hoydølum. Yvir 80 rennarar vóru til start, og er tað nógv størsta tal nakrantíð til FM í Lendisrenning. Líkindini at renna í morgun vóru avbera góð og lendið var, hóast nógvan kava fyrr í vikuni, turrari enn væntað. Vindur var mestsum ongin og sólin kagaði fram.

(myndir: Einar Vang) – myndasavnið er her: http://www.einarvang.com/vk5_2015

Tey vaksnu júst byrjað, og favorittarnir á odda.

Út á 2. umfar tók Hallur leiðsluna, meðan Jan Elmar, Rúni og Julian eltu. Sam misti nógv hesa løtuna, men kom væl aftur seinni og gjørdist nr. 3.

Hørð kapping var eisini beint aftanfyri førarafeltið. Fremst Teitur, síðan sterki danin Martin Gravesen, Niels Poulsen, Marnar Pattinson, Regin Áki Hansen, Guttorm Sørensen og Henry Olsen.

Tríggjar tær fremstu kvinnurnar vóru púra javnar fyrstu fýra umførini, Fyrst mátti Borgarhjørt Holm sleppa, og út á seinasta av teimum seks umførunum, fór Rebekka Fuglø undan Rigmor N. Arge.

Tað sær hugnaligt út, men tað er sanniliga hart, og tað bleiv eisini kempað hart um hvørja plasering. 

Luttøkan í dag var so stór, at børnini máttu byrja tveir minuttir undan teimum vaksnu, fyri at tað skuldi vera pláss at renna. Sum altíð er ein øgilig ferð á børnunum.