Marnar og Rigmor sigraðu í GP-6 á Vestanstevnu

Marnar Djurhuus og Rigmor N. Arge vóru fyrst um málstrikuna, tá Frælsi skipaði fyri sætta og næstseinasta umfari í Summar Grand Prix á Vestanstevnuni í Miðvági leygarmorgunin. Runnið bleiv av Vatnsoyrum til MB-húsið í Miðvági, sum er einar 6 kilometrar. Tað regnaði alla tíðini meðan runnið varð. Framvið vatninum var eisini nakað av mótvindi, íð kortini ikki darvaði nakað serligt.

Hjá monnunum var Marnar Djurhuus skjótt leysur frá restini, men munurin øktist lítið framvið vatninum í mótvindinum, har teir næstu, Henry Olsen, Marnar Pattinson og Einar Gregersen skiftust um at føra. Tá teir runnu oman í Miðvág setti Marnar meiri ferð á og gjørdist tryggur vinnari við tíðini 21.35 min. Á veg gjøgnum oman gjøgnum Miðvág bleiv kappingin um næstu plássini avgjørd og var Henry stinnastur á øðrumplássi við 22.13 min. frammanfyri Einar við 22.24 min. og Marnar 22.30 min.

Rigmor lá einsamøll allan vegin og vann tryggan sigur við 25.50 min. frammanfyri Astrid Joensen á øðrumplássi við 28.04 min. og Karin K. Petersen við 31.44 min.

Myndir, sum Jóannes N. Poulsen tók, eru at finna her: Vestanstevnurenning 2014