Úrslitini frá TF VK 3 á Argjum

76 rennarar komu á mál við Skúlan á Argjahamri í dag, tá triðja umfar av TF Vetrarkappingini varð runnið. Ikki eins nógv sum Runt Agnið, men sera gleðiligt at síggja dreinga- og serliga gentubólkin so væl mannaðan. 10 gentur vóru tilmeldaðar í dagsins kapping, og tað er hægsta tal leingi.

Tað var nakað av vindi úti á Argjum í morgun, og tungt var at renna mótbrekkuna av Glyvursnesi í mótvindi. Hetta var triðja árið, at renningin bleiv fyriskipað á Argjum.

(myndirnar hevur Fríðrikur Bláhamar tikið)

Oddvør Josephsen, sum verður ein av føroysku oyggjaleikarennarunum í summar, vísti góðan form og vann gentubólkin

Kappingin hjá dreingjunum gjørdist sera spennandi og endaði í einum spurti, har Hans gjørdist eitt sekund undan Hans Erlandi

Eisini Rebekka Fuglø vísti góðan form, og vann greiðan sigur í opna bólkinum hjá kvinnum.

Marnar Djurhuus fekk grótharða kapping frá Jan Elmari, tá teir runnu Runt Agnið. Í dag gjørdist sigurin væl greiðari. Marnar kappaði næstan tríggjar minuttir av rutumetinum.