Betri VK2: stór útskifting á pallinum

Allir tríggir menninir og tvær kvinnur í opna bólkinum vórðu ústskift frá VK1, tá heiðurskrónurnar skuldu latast til bestu rennararnar í Kerjarenningini. Einans Beinta Hoydal Joensen gekk aftur, hesuferð sum gullvinnari, eftir at hon vann silvur seinast.

Hvørgin av vinnarunum Runt Agnið vóru við í kappingini undir Kerjum. Andrias Hansen, sum vann ein greiðan sigur seinast, er í Valencia, har hann skuldi renna maraton í morgun. Vit hava tíverri ikki fingið fatur á úrslitinum hjá honum enn. Súsanna Skylv, sum vann kvinnukappingina seinast, var heldur ikki við í gjár.

Nú Andrias ikki var við, var kanska hóskandi at bróðurin Eirikur kom við aftur. Tí líka trygt sum Andrias vann Runt Agnið, líka tryggur var Eirikur í gjár. Hann legði seg klárt á odda beinanvegin, og tað var ongantíð nakar ivi um, hvør var besti rennarin hendan dagin. Men silvur- og bronsuvinnararnir vóru óvæntaðir. Dánjal Dahl Ljósheim, sum gjørdist nummar 13 Runt Agnið, hevði funnið ein heilt annan gearkassa fram til dagsins kapping, og fekk enn einaferð prógvað, at hann kann blíva ein av okkara bestu rennarum, tá hann í stórum stíli rann seg til annaðplássið.

Eirikur Hansen vinnur Kerjar í stórum stíli. Nú verður spennandi at síggja næsta leygardag, hvør av brøðrunum er tann stinnari í løtuni.

Hóast Dánjal rann seg heilt frá 13. plássi seinast til 2. pláss í gjár, var bronsuvinnarin tó enn meira óvæntaður. Her var talan um nýtt navn. Ragnar Rasmussen, sum umboðar Hvirluna, hevur sum vit vita, ikki roynt seg í rennikappingum áður. Bert 17 ára gamli Ragnar legði hart út, og hinir rennararnir undraðust á hvør hesin ungi fýrurin var, og nær hann mundi køvast og byrja at dragna. Men hetta hendi ikki. Á tunga renniteininum stríddist hesin ókendi Ragnar allan vegin og hevði nóg mikið av orku at stríða seg til bronsuna væl framman fyri Regin Thomsen, sum enn einaferð gjørdist nummar fýra.

Ragnar Rasmussen loypti hvøkk á øll við einum sannførandi triðja plássi. Vónandi síggja vit meira til Ragnar í komandi kappingum!

Hjá kvinnunum var tað endiliga Beinta Hoydal Joensen, sum slapp at standa ovast. Runt Agnið førdi hon stóran part av teininum, men varð tikin aftur á seinasta triðingi. Í gjár kundi søgan endurtikið seg, men Beinta megnaði tó at halda Durutu R. á Lofti aftanfyri seg. Einans níggju sekund vóru millum tær á málinum. Síðan var nakað aftur til Hergerð Heldarskarð á triðja plássi. Eins og hjá Durutu var hetta fyrsta umfar í ársins Vetrarkapping. Beinta, Duruta og Hergerð eru allar í veteranbólkinum, og vunnu tí bæði opnu kappingina og veterankappingina. Hetta mugu tær yngru kvinnurnar gera okkurt við til næstu ferð, sum bara er um eina viku.

Beinta Hoydal Joensen rennur seg her til sín fyrsta sigur nakrantíð í Vetrarkappingini. Nú førir hon samlaðu kappingina hjá kvinnum.

Myndir úr myndasavninum hjá Hvirluni síggjast HER – og myndirnar í hesi greinini eru eisini fingnar haðani.

Triðja umfar av Betri Vetrarkappingini verður longu komandi leygardag, 25. november. Tilmeldið beinanvegin BEINT HER.