Eirikur gjørdi bart undir Kerjum

Renniveðrið var av tí fagrasta í dag, tá Hvirlan bjóðaði til 2. umfar av TF Vetrarkappingini. Kavin á rossagøtuni og í Havnardali gjørdi tað tó eitt sindur ivasamt, um tað var ráðiligt at skipa fyri kapprenning í tvørliga geinginum. Tað skal tó nakað meir enn hetta at leggja vetrarrennarum fótonglar í vegin, og kappingin varð gjøgnumførd sum ætlað.

Eirikur er í stórformi, og vann fyri aðru ferð eitt umfar av Vetrarkappingini. Fyrru ferð var í 2010 (mynd: Hvirlan)

At lendisrenning er við at vinna fram í Føroyum sást aftur á nógvu rennarunum, sum runnu í trail-skóm. Og tað var ein stórur fyrimunur á degnum. Eirikur Hansen úr Bragdinum var tó í vanligum renniskóm. Tað helt honum tó ikki aftur í at seta ferð á. Fyrstu kilometrarnar vóru tað tó Jan Elmar Sørensen og Guðmundur Joensen, sum trektu, meðan Eirikur og Julian Gregersen, fylgdu aftaná. Tá teir komu út á vegin var tað so Eirikur, sum setti ferð á. Tá var tað bert Jan Elmar sum megnaði at fylgja við, men beint eftir vatnbrunnin mátti eisini hann sleppa, og Eirikur fekk eitt hol uppá ein lítlan hálvan minutt.

Jan Elmar royndi at treiskast allan vegin heim, men Eirikur helt støðuni, og vann sína fyrstu Vetrarkapping síðan 2010 og aðru Vetrarkapping nakrantíð. Jan Elmar kom á mál 15 sekund seinni. Guðmundur Joensen, sum nú umboðar Hvirluna, betraði sítt fimtapláss frá seinast, og gjørdist hesaferð nummar trý, hálvan annan minutt eftir Eirik. Hesaferð knógvaði hann Julian Gregersen og Sam Vang, sum vóru framman fyri á Toftum.

Eisini hjá kvinnunum fingu vit ein nýggjan vinnara í dag. Rebekka Fuglø, sum var á renniseminari fyri 14 døgum síðani, var nú við aftur. Meginpartin av teininum fylgdist hon við vinnaranum frá seinast, Rigmor N. Arge. Komnar heim móti fjósunum, setti hon ferð á og royndi at avgera kappingina. Hon fekk eitt fitt hol, men gjørdist tó heldur ring av livurhøggi, og mátti stríðast ein harðan dyst, so Rigmor ikki skuldi fáa fatur á henni aftur. Á málinum var bert lítil hálvur minuttir millum tær. Ein minutt eftir Rigmor kom Duruta R. á Lofti rættiliga einsamøll á triðja plássi.

Rebekka Fuglø var við aftur, men mátti stríðast fyri at basa Rigmor. Duruta var trygg á bronsuplássinum (mynd: Hvirlan)

Rigmor og Duruta, sum eru veteranar, gjørdust sostatt nummar eitt og tvey í veteranbólkinum. Kappingin um triðja plássið var hørð og spennandi. Hon stóð millum tær tríggjar javnt sterku Bragdarkvinnurnar, Kristu Nielsen, Ann Thomsen og Beintu Hoydal Joensen. Bert góður hálvur minuttur var millum tær, og aftur hesaferð eydnaðist Kristu at halda Ann og Beintu aftanfyri.

Sam Vang, sum vann hjá veteranunum seinast, hevði eina minni góða kapping í dag, og endaði á sætta plássið í opna bólkinum. Hann megnaði ikki at verja veteran-gullið frá seinast, men mátti síggja Martin Gravesen fara avstað við sigrinum. Nakað aftanfyri teir báðar kom Henry Olsen, sum enn ikki er komin í gongd at venja ordiliga eftir eitt hart maraton-heyst.

Hóast Jens R. Weihe er “ov gamal” til super-veteranarnar, so megnar eingin at koppa hann av trúnuni. Hóast hann fekk ein ordans sendara úti í Havnardali, reistist hann aftur, og vann ein enn tryggari sigur í dag enn seinast. Aftur í dag var tað Rani Nolsøe, sum gav harðastu mótstøðuna, og hann helt so Kára Simonsen á triðja plássi tríggjar minuttir aftanfyri.

Enn stendur Jens tí mesta av ungdóminum kurl, hóast hann í veruleikanum er ryktur úr bólkinum superveteranar (mynd: Hvirlan)

Hjá kvinnuligu superveteranunum skiftu nummar eitt og tvey frá seinastu um pláss. Cecilia Arendal var hesaferð frammanfyri Sunnevu Olsen. Jóngerð H. Høgnesen megnaði enn einaferð at koma á triðjapláss.

Hjá dreingjunum fingu vit eina spennandi kapping millum Dánjal Dahl Ljósheim úr Hvirluni og Hans Sivertsen úr Treysti. Dánjal helt Hans 5 sekund aftanfyri, og vann sín næsta sigur í vetur. Hans Erland Thomsen úr Bragdinum bleiv nummar trý. Eisini hjá gentunum fingu vit sama vinnara. Maria Biskopstø er sera sterk á longu teinunum, og verður ring at basa. Unna Ró Jacobsen úr Bragdinum koyrdi hart á, og endaði minni enn hálvan minutt aftanfyri. Oddvør Josephsen hevur verið nógv sjúk í seinastuni, og var júst blivin frísk aftur. Gott at síggja hana í kapping aftur. Hon gjørdist nummar trý í dag, og ætlar sær ivaleyst longur fram seinni í vetur.

Dánjal Dahl Ljósheim úr Hvirluni rennur sera væl fyri tíðina, og vann gull fyri aðru ferð í vetur. Hann skal tó ansa sær fyri Hans Sivertsen úr Treysti, sum eisini rennur sera væl (mynd: Hvirlan)

Maria Biskopstø, Treysti við góðum rennistíli og góðum treysti (mynd: Hvirlan)

Mansunglingarnir høvdu somu raðfylgju sum seinast. Julian Gregesen var eitt sindur longur frá teimum fremstu monnunum, menn vann kortini tryggan sigur hjá unglingunum. Gunnar Sivertsen rann eisini stak væl, og við sjeynda plássi í opna bólkinum kemur hann skjótt upp millum teir bestu langteinarennararnar her heima. Nýggi ungi maðurin, Rógvi Kárason, umboðar nú Bragdið. Hann hevur enn mest vant á bandi, og fekk tað tí hart í brekkunum í dag. Hann megnaði tó at varðveita triðjaplássið frá seinast.

Mansunglingarnir høvdu somu raðfylgju sum seinast: Gunnar, Julian og Rógvi (mynd: Hvirlan)

Aftur í dag vóru omanfyri 100 rennarar. Og teir hildu allir, at heitt kakao hóskar væl til kaldan kava. Harumframt bjóðaði Hvirlan vatn, sisu, bollar og bananir. Hetta kom væl við eftir strævna túrin á tungu rutuni.

Eftir renningina var eisini lutakast um fleiri spennandi vinningar, so nøkur, sum ikki vunnu í renningini, kundu kortini fara heim við onkrum vinningi.

Tey yngstu runnu 1,5 km og hildu tí til beins undan teimum vaksnu, sum runnu 10,5 km. Saman við hugnarennarunum vóru yvir 100 fólk og runnu (mynd: Hvirlan)