Feðgar í gullrúsi

Startskotið júst latið av, og rennararnir halda til beins á nýggju/broyttu norðoyastevnurutuna. (mynd: Treysti, Jóannes)

Síðani 1997 hevur Guttorm Sørensen verið høvuðsfyriskipari av renningini á norðoyastevnurenningini. Og fleiri ferðir hevur hann eisini staðið ovast á sigursskamlinum eftir lokna kapping. Tað gjørdi hann aftur í dag, men hesuferð var tað veteranbólkin, sum hann vann. Sigurin í opna bólkinum hjá monnunum fall tó ikki so øgiliga langt uttanfyri familjuna, tí á fyrsta sinni eydnaðist tað Jan Elmari Sørensen, soni Guttorms, at sigra á norðoyastevnu. Jan Elmar hevur verið væl við hetta seinasta árið, og vann eisini eitt umfar í TF Vetrarkappingini.

Sam Vang var tann, sum longst kláraði at halda fast í Jan Elmari í dag. Men tá teir fóru út á seinastu 1800 metrarnar, var so smátt byrjað at slitna millum teir, og tá teir komu á málið var sigurin greiður. Andrias Hansen er við at koma fyri seg aftur, og rann seg til eitt trygt triðjapláss.

Rebekka Fuglø rann ómetaliga væl í dag, og skar eitt fitt petti av síni bestu tíð á 5 km. Hetta tryggjaði henni ein tryggan sigur. Á øðrum plássi kom Ása K. Thomsen úr Klaksvík. Eitt spildurnýtt navn í rennihøpi. Ása er kend frá kvinnufótbóltsliðnum hjá KÍ, men hennara flotta úrslit boðar frá einum sera evnaríkum rennara, sum so avgjørt átti at roynt seg innan okkara ítróttargrein. Á triðja plássi, bert nøkur fá sekund eftir Ásu, kom veteranurin Rigmor N. Arge, sum vísir góðan form, nú eina viku undan FM í maraton.

Øll úrslitini síggjast her undir. – myndir eru í myndasavninum hjá Tresti.