Hallur og Rebekka vunnu TF VK-6 á Fossánesi

Hallur Holm úr Bragdið og Rebekka Fuglø úr Treysti vunnu opnu bólkarnar hjá ávikavist monnum og kvinnum, tá Treysti í dag skipaði fyri 6. umfari í TF Vetrarkappingini á Fossánesi. Sjálvt um teinurin einans er umleið 7,3 kilometrar, so er talan um eina harða rutu. Rennast skulu fýra umfør í økinum rundan um Skúlan á Fossánesi. Luttøkan var góð og vóru einir 60 rennarar møttir til start, hóast veðurforsøgnin boðaði frá fitt av vindi. Veðrið royndist kortini munandi betur, men hartil skal sigast, at rennarar ræðast hvørki vind ella regn.

Startskotið er latið av og rennararnir spenna avstað niðan brekkuna niðanum Skúlan á Fossánesi

Hallur legði avstað sum eitt óløgi og fekk eitt hol í byrjanini, men tá teir byrjaðu uppá næsta umfar var Marnar Pattinson, sum heðvi ein góðan dag, beint aftanfyri, og bert eitt vet aftanfyri lá Rúni Seloy. Síðani var eitt glopp aftur til Jan Elmar Sørensen, sum luttók hóast hann ikki var heilt væl fyri, og beint aftanfyri hann kom Julian Gregersen. Tað bleiv koyrt øgiligt á í oddinum og endin varð at Hallur (28.40) vann frammanfyri Rúna (28.52) og Marnar (29.03). Nokkso tætt var eisini millum teir næstu og bleiv Jan Elmar (29.14) nummar fýra, og so Julian (29.25) og Teitur (29.33).

Hallur Holm vann í dag frammanfyri Rúna Seloy og Marnar Pattinson

Hjá kvinnunum gjørdist Rebekka Fuglø (35.28) fremst, og henni næst kom Duruta Reginsdóttir á Lofti (35.53) og Beinta Hoydal Joensen (36.24). Tær tríggjar lógu nokkso javnar nokkso leingi.

Rebekka og Duruta koma her oman á Fossávegin 

Hjá veteranmonnum vann Hallur frammanfyri Henry Olsen og Guttorm Sørensen. Hjá veterankvinnunum vann Duruta frammanfyri Ann Thomsen og Astrid Joensen.

Superveteranbólkin hjá monnum vann Jens R. Weihe og honum næstir komu Pól Sundskarð og Jóannes Ortind. Sunneva Olsen vann enn einaferð superveteranbólkin hjá kvinnum. Nummar tvey gjørdist Jóngerð Herup Olsen og Jessie Hansen nummar trý.

Mansunglingabólkin vann Rúni Seloy. Nummar tvey gjørdist Julian Gregersen, meðan Teitur Bjarnastein bleiv nummar trý.

Genturnar Maria Biskopstø, Oddvør Josephsen og Elin Kristina Ryan gjørdu ein tripp-trapp-treysti. Gunnar Sivertsen vann dreingjabólkin frammanfyri Hans Erland Thomsen og Dánjal Dahl Ljósheim.

Eftir renningina bjóðaði Treysti suppu, kaffi/te og køku í Skúlanum á Fossánesi, har borgarstjórin í Hvannasunds Kommunu, Katrin Næs, handaði heiðursmerkir.

Øll úrslitini eru at finna niðanfyri. Myndir sum Jóannes Poulsen tók eru at finna her.

Úrslit TF VK-6 á Fossánesi 28. februar 2015 kl. 11.00